ಬೆಂಗಳೂರು (ಜ. 23): ಸತತ ಮೂರು ಸೋಲುಗಳ ನಿರಾಸೆಯಲ್ಲಿದ್ದ ಬೆಂಗಳೂರು ಬುಲ್ಸ್ ತಂಡ ಕೊನೆಗೂ ಗೆಲುವಿನ ಟ್ರ್ಯಾಕ್ ಗೆ ಬರಲು ಯಶಸ್ವಿಯಾಗಿದೆ. ಭಾನುವಾರ ನಡೆದ ಪಂದ್ಯದಲ್ಲಿ ಬೆಂಗಳೂರು ಬುಲ್ಸ್ ತಂಡ ತೆಲುಗು ಟೈಟಾನ್ಸ್ ತಂಡವನ್ನು ಸೋಲಿಸುವ ಮೂಲಕ ಎಂಟನೇ ಅವೃತ್ತಿಯ ಪ್ರೊ ಕಬಡ್ಡಿ ಲೀಗ್ ನಲ್ಲಿ 8 ತನ್ನ 8ನೇ ಗೆಲುವು ಸಾಧಿಸಿದ್ದು ಮಾತ್ರವಲ್ಲದೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಲು ಯಶ ಕಂಡಿತು. ಇದಕ್ಕೂ ಮುನ್ನ ನಡೆದ ದಿನದ ಮೊದಲ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್ ತಂಡ ಯುಪಿ ಯೋಧಾ ತಂಡವನ್ನು ಭರ್ಜರಿಯಾಗಿ ಮಣಿಸುವಲ್ಲಿ ಯಶ ಕಂಡಿತು.
ಗೆಲುವು ಸಾಧಿಸಲೇಬೇಕು ಎನ್ನುವ ನಿಟ್ಟಿನಲ್ಲಿ ಕಣಕ್ಕಿಳಿದಿದ್ದ ಬೆಂಗಳೂರು ಬುಲ್ಸ್ ತಂಡ ಮೊದಲ ನಿಮಿಷದಿಂದಲೇ ತನ್ನ ಘಾತಕ ದಾಳಿ ನಡೆಸಿತು. ಪ್ರತಿ ಹಂತದಲ್ಲೂ ಅಂಕಗಳಿಕೆಯಲ್ಲಿ ಪ್ರಗತಿ ಕಾಣುತ್ತಾ ಸಾಗಿದ ಬೆಂಗಳೂರು ಬುಲ್ಸ್ 36-31 ರಿಂದ ತೆಲುಗು ಟೈಟಾನ್ಸ್ ತಂಡವನ್ನು ಮಣಿಸಿತು. ಬುಲ್ಸ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿಭಾಯಿಸಿದ ನಾಯಕ ಪವನ್ ಕುಮಾರ್ ಶೇರಾವತ್ 12 ಅಂಕ ಸಂಪಾದನೆ ಮಾಡಿದರೆ, ಇನ್ನೊಬ್ಬ ರೈಡರ್ ಭರತ್ ರಿಂದಲೂ ಅವರಿಗೆ ಉತ್ತಮ ಸಾಥ್ ಸಿಕ್ಕಿತು.
ಭರತ್ 7 ಅಂಕ ಸಂಪಾದನೆ ಮಾಡಿ ಗಮನಸೆಳೆದರು. ಡಿಫೆಂಡರ್ ಗಳಾದ ಸೌರಭ್ ನಂದಲ್ ಹಾಗೂ ಅಮಾನ್ ಕೂಡ ತಲಾ 4 ಅಂಕ ಸಂಪಾದನೆ ಮಾಡುವ ಮೂಲಕ ತೆಲುಗು ಟೈಟಾನ್ಸ್ ತಂಡದ ರೈಡರ್ ಗಳಿಗೆ ಕಡಿವಾಣ ಹಾಕಿದರು. ಈ ಗೆಲುವಿನೊಂದಿಗೆ 14 ಪಂದ್ಯಗಳಲ್ಲಿ 8 ಗೆಲುವು, 5 ಸೋಲು ಹಾಗೂ 1 ಟೈ ಫಲಿತಾಂಶ ಕಂಡಿರುವ ಬೆಂಗಳೂರು ಬುಲ್ಸ್ ತಂಡ 46 ಅಂಕ ಸಂಪಾದನೆಯೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಸಂಪಾದನೆ ಮಾಡಿತು. ಇನ್ನೊಂದೆಡೆ ತೆಲುಗು ಟೈಟಾನ್ಸ್ ತಂಡ ಕೇವಲ ಒಂದು ಗೆಲುವಿನೊಂದಿಗೆ ಅಂಕಪಟ್ಟಿಯಲ್ಲಿ ಕೆಳ ಸ್ಥಾನದಲ್ಲಿಯೇ ಉಳಿದಿದೆ.
ಪವನ್ ಶೇರಾವತ್ ಪಂದ್ಯದಲ್ಲಿ ಸಂಪಾದನೆ ಮಾಡಿದ 12 ಅಂಕಗಳ ಪೈಕಿ 10 ಅಂಕಗಳು ಮೊದಲ ಅವಧಿಯ ಆಟದಲ್ಲಿಯೇ ಬಂದಿದ್ದವು. 2ನೇ ಅವಧಿಯ ಆಟದಲ್ಲಿ ಎಚ್ಚರಿಕೆಯಿಂದ ದಾಳಿ ಮಾಡಲು ಆರಂಭಿಸುವ ಮೂಲಕ ಗೆಲುವಿಗೆ ಕಾರಣರಾದರು. ತೆಲುಗು ಟೈಟಾನ್ಸ್ ತಂಡದ ರಜನೀಶ್ ಇಲ್ಲದೆ ಕಣಕ್ಕಿಳಿದಿದ್ದು ಪ್ರದರ್ಶನದ ಮೇಲೆ ಪರಿಣಾಮ ಬೀರಿತು. ಇದರಿಂದಾಗಿ ಆರಂಭದಲ್ಲಿಯೇ ಅಬ್ಬರಿಸಿದ ಬೆಂಗಳೂರು ಬುಲ್ಸ್ ಕೇವಲ 10 ನಿಮಿಷದಲ್ಲಿಯೇ ತೆಲುಗು ಟೈಟಾನ್ಸ್ ತಂಡವನ್ನು ಆಲೌಟ್ ಮಾಡುವಲ್ಲಿ ಯಶಸ್ವಿಯಾಗಿತ್ತು. ಪವನ್ ಶೇರಾವತ್ ಗೆ ಉತ್ತಮ ಸಾಥ್ ನೀಡಿದ ಭರತ್, ತೆಲುಗು ತಂಡದ ಡಿಫೆನ್ಸ್ ವಿಭಾಗದ ಮೇಲೆ ನಿರಂತರವಾಗಿ ದಾಳಿ ನಡೆಸಿದರು. ಮೊದಲ ಅವಧಿಯ ಆಟದಲ್ಲಿಯೇ 11 ಅಂಕಗಳ ಮುನ್ನಡೆ ಕಂಡುಕೊಳ್ಳುವ ಮೂಲಕ ಬುಲ್ಸ್ ಭರ್ಜರಿಯಾಗಿ
ಹರಿಯಾಣ ಸ್ಟೀಲರ್ಸ್ ಗೆ ಗೆಲುವು: ದಿನದ ಮೊದಲ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್ ತಂಡ ಕೇವಲ 1 ಅಂಕದಿಂದ ಯುಪಿ ಯೋಧಾ ತಂಡವನ್ನು ಮಣಿಸಿತು. ರೈಡರ್ ಹಾಗೂ ಡಿಫೆಂಡರ್ ಗಳ ಸಂಘಟಿತ ಪ್ರಯತ್ನದಿಂದ 36-35 ಅಂಕಗಳಿಂದ ಬಲಿಷ್ಠ ಯುಪಿ ಯೋಧಾ ತಂಡವನ್ನು ಸೋಲಿಸಿತು.
